BUYUK ALLOMAGA EHTIROM.

O‘tgan o‘n ikki yilning har bir kuni esda qolarli. Biz bu kunlarni uzoq kutdik. Iztiroblar oralab, uzoq yo‘l yurib yetganmiz bu kunlarga. Rizoning boshi sabr ekan. Istiqlol sabrimizni saodatga uladi. Shu bois nafaqat biz xursandmiz, ayni chog‘da istiqlolni orzu qilgan bobolarimizning ruhi ham shod.

Yurtboshimizning millat o‘tmishiga yuksak ehtiromi, kelajagiga qat’iy ishonchi sabab o‘tgan 12 yil ichida tilimiz, asrlardan asrlarga o‘tib kelayotgan milliy urf-odatlarimiz, an’analarimiz, dinimiz qayta tiklandi. Muqaddas qadamjolar obodonlashtirildi. Ayniqsa, buyuk bobolarimiz hayotiga, ularning insoniyat sivilizatsiyasida muhim o‘rin tutgan ijodiy merosiga katta e’tibor qaratilmoqda. Imom Buxoriy, Ahmad Farg‘oniy, Moturudiy, Bahouddin Naqshband, Mirzo Ulug‘bek kabi ulug‘ allomalarimizning to‘ylari xalqaro miqyosda keng nishonlandi. Bu milliy g‘urur va o‘zlikning uyg‘onganidan dalolatdir.

...O‘tgan yilning oktyabr oyida Prezident Islom Karimov Buxoroga tashrifi chog‘ida G‘ijduvon shahrida ham bo‘lib, G‘ijduvoniyning qadamjolarini ziyorat qildi. Oradan ko‘p o‘tmay, 2002-yil 4-dekabr kuni O‘zbekiston Respublikasi Vazirlar Mahkamasining “Xoja Abdulholiq G‘ijduvoniy tavalludining 900 yilligini nishonlash to‘g‘risida”gi qarori e’lon qilindi.

Mamlakatimizda, ayniqsa Buxoroda, qutlug‘ to‘yga tayyorgarlik ishlari boshlab yuborildi. Bu sananing YUNESKO qarori bilan xalqaro miqyosda nishonlanishi G‘ijduvoniy hazratlari ilmiy merosini o‘rganish borasidagi yangi tadqiqotlarga imkoniyat yaratdi. Yubiley munosabati bilan alloma hayoti va ijodiga bag‘ishlangan ilmiy anjumanlar o‘tkazildi, yangi kitoblar nashr etildi.

Naqshband va G‘ijduvoniy maqbara-majmuolari atrofida ulkan bog‘ barpo etildi. G‘ijduvondagi Ulug‘bek madrasasi qayta ta’mirlandi. Bu ishlarni bajarishda Xorazm, Namangan, Samarqand, Toshkent, Farg‘ona viloyatlaridan kelgan qo‘li gul ustalar faol qatnashdi.

Abdulholiq G‘ijduvoniy hazratlari odamlarni poklik, to‘g‘rilik, halollikka boshlagan. U o‘z shogirdlari uchun odob-axloqqa oid bir nechta qonun-qoidalar ishlab chiqqan. Uning bizgacha yetib kelgan “Risolai sohibiya”, “Risolai tariqat”, “Vasiyatnoma”, “Maslak al-orifin”, “Maqsad as-solikin”, “Maqomoti Xoja Yusuf Hamadoniy” kabi kitoblarida ilm va odob, inson va uning jamiyatdagi o‘rni, din va dunyoviy munosabatlar to‘g‘risida fikr yuritilgan.

O‘zbekiston Respublikasi Prezidenti Islom Karimov Abdulholiq G‘ijduvoniy tavalludining 900 yilligiga bag‘ishlangan tantanalarda ishtirok etish uchun 27-noyabr kuni Buxoroga keldi. Yurtboshimiz Abdulholiq G‘ijduvoniy maqbarasi, Bahouddin Naqshband maqbara-majmuasi atrofida amalga oshirilgan ishlar bilan tanishdi. G‘ijduvoniy va Naqshband maqbara-majmuasi ziyoratgoh xiyobonlari yanada chiroy ochgan.

Abdulholiq G‘ijduvoniy tavalludining 900 yilligiga bag‘ishlangan tantanalar Bahouddin Naqshband maqbara-majmuasida bo‘lib o‘tdi. Bu yerga viloyatlar, Qoraqalpog‘iston Respublikasi va Toshkent shahridan mehmonlar tashrif buyurishdi.

Tadbirda O‘zbekiston Respublikasi Prezidenti Islom Karimov nutq so‘zladi. Davlatimiz rahbari tantana ishtirokchilarini, ular siymosida butun xalqimizni ushbu qutlug‘ ayyom bilan muborakbod etdi.

Ulug‘ bobolariga va ularning o‘lmas merosiga ulkan e’tibor qaratgan, avlodlarini ajdodlarga munosib qilib tarbiyalaydigan millatning umri boqiydir. Prezidentimiz mustaqillik yillarida, jumladan, Bahouddin Naqshband va Abdulholiq G‘ijduvoniy maqbara-majmuasida keng ko‘lamdagi ta’mirlash va bunyodkorlik ishlarini amalga oshirgan, tarixiy yodgorliklarimizga qayta jilo bergan, yangi binolar va inshootlar barpo etgan mohir quruvchi va ustalarga, muhandis va me’morlarga, mana shu savobli ishlarga o‘z ulushini qo‘shgan barcha insonlarga minnatdorlik izhor etdi.

Mamlakatimizda amalga oshirilayotgan bu kabi ulug‘vor ishlar, to‘y-ma’rakalar yurtimizdagi tinchlik va osoyishtalik, xalqimizning yaratuvchanlik salohiyati, ozod va obod Vatan, adolatli jamiyat barpo etish yo‘lidagi fidoyi mehnati, ertangi kunga ishonchidan yana bir dalolatdir.

Tadbirda Muhiddin bobo Boqiyev so‘zga chiqib, buyuk ajdodlarimiz ruhini shod etmoq, ularning muqaddas qadamjolarini obodonlashtirmoq eng savobli ishlardan biri ekanini ta’kidladi. Bu ulug‘vor ishlarning tashabbuskori va rahnamosi bo‘lgan Yurtboshimizga minnatdorlik bildirdi.

Shu kuni mamlakatimiz rahbari G‘ijduvon shahridagi besh yuz o‘rinli sport saroyining ochilish marosimida ishtirok etdi. Ushbu sport majmuasida yoshlar sportning sakkiz turi bilan shug‘ullanishlari uchun barcha imkoniyatlar muhayyo etilgan.