Bugun hech bir soha taraqqiyotini kompyuter texnologiyalarisiz tasavvur qilib bo‘lmaydi. Xususan, mamlakatimizda kutubxonalar tizimining kompyuterlashtirilishi yurtdoshlarimizning zarur adabiyotlar bilan tanishish, qulay va tezkor axborot olish borasidagi imkoniyatlarini yanada kengaytirdi.
Ta’kidlash joizki, Prezidentimizning 2011-yil 23-fevraldagi "2011 - 2015-yillar uchun axborot-kommunikatsion texnologiyalar bazasida axborot-kutubxona va axborot-resurs xizmat ko‘rsatishni keyinchalik sifatli rivojlantirish bo‘yicha chora-tadbirlar to‘g‘risida"gi qarori bu boradagi islohotlarni yangi bosqichga ko‘tardi. Natijada ziyo maskanlari yangi adabiyotlar bilan boyitilishi barobarida, sohaga zamonaviy texnologiyalarning jadal kirib borishi, xususan, kompyuter yordamida adabiyotlarning elektron nusxalarini yaratish, masofadan turib o‘qitish singari tezkor faoliyat turlari joriy etildi.